Қарағанды облыстық бейнелеу өнері музейінің қорында қазақ жерінің мәдениетін, өнерін, кең байтақ жерлері мен тұрмыс - тіршілігін, сондай-ақ, белгілі тұлғалардан қарапайым халық өмірі мен еңбегін паш ететін ауқымды «Қазақстан кескіндемесі» атты бөлімі бар. Бұл бөлім бойынша жүз жетпіске тарта авторлар мен төрт жүзге жуық туындылар сақталуда.

Қазақстан кескіндемесі бөлімінде ХІХ ғасырдың аяғы және қазіргі уақытқа дейінгі суретшілер қатары бар. Оның ішінде Қазақстандағы кескіндеме мектебінің алғаш дамуы мен қазақ халқының салт-дәстүрлері мен тұрмысын көрсеткен алғашқы кәсіби суретші Николай Хлудов; Қазақтың әйгілі кескіндемешісі, график суретшісі, қазақ бейнелеу өнерінің негізін салушылардың бірі, Н.Г. Хлудовтың шәкірті, Қазақ КСР-нің Халық суретшісі Әбілхан Қастеев; Қазақ КСР-інің Халық суретшісі Айша Ғалымбаева; Қазақ КСР-інің Еңбек сіңірген өнер қайраткері, Қазақ КСР-інің Халық суретшісі Гүлфайрус Ысмаилова; Қазақ КСР-інің Халық суретшісі Абрам Черкасский; Өнертану ғылым кандидаты, Қазақ КСР-інің Халық суретшісі Нағым-Бек Нұрмұхаммедов; ҚР. Еңбек сіңірген өнер қайраткері Абдырашит Сыдыханов т.б. көптеген белгілі тұлғалар бар.