Қарағанды облыстық бейнелеу өнері музейі қорында танымал суретші Әбуов Тұрсынның «Теміртаулық белгілі болатшылар» 1974.; «Қиын жылдарда» 1985.; «Құрманғазы» сияқты туындылары сақтаулы.

Әбуов Тұрсын - Кескіндемеші, мүсінші, Қазақстан Суретшілер одағының мүшесі, Қазақстанның еңбек сіңірген қайраткері. Тұрсын Әбуов 1936 жылы 6 маусымда Алматы облысындағы Қызыл Ту колхозында дүниеге келген. Әкесі 1941 жылы Ұлы Отан соғысына аттанып, елге оралмаған. Анасының тәрбиесін көріп өскен Т.Әбуұлы бес жасынан суретші болуды армандайды. Мектептен кейін Алматы қаласындағы Гоголь атындағы бес жылдық училищені үздік бітіреді. Одан кейін Абай атындағы Қазақ педагогика институтының көркем-сурет факультетін тәмамдайды. 1966 жылдан бері қарай ол өз еңбектерімен көптеген көрмелерге қатысты. Соның ішінде оның туындылары Ресей, Қырғызстан, Өзбекстан, Түркия, Корея, Тәжікстан, Әзірбайжан, Армения, Украина, Аустрия, Голландия, Бельгия және басқа да мемлекеттерде өткен халықаралық көрмелерден орын алды. Бүгінде бірқатар еңбектері мемлекеттік мекемелерде және жеке адамдардың қолында, сондай-ақ шетелдік коллекцияларда сақтаулы тұр.

Ол Қазақстан бейнелеу өнерінің кәсіби суретшісі. Осы шығармашылық салада жарты ғасырдан астам уақыт бойы тынбай еңбек етіп келеді. Бүгінде Алматы қаласында тұрады.